సాయికృష్ణ కేసులో సంచలన అంశాలు.. రిమాండ్ రిపోర్ట్‌లో కీలక వివరాలు

గాదె సాయికృష్ణ అదృశ్యం కేసులో సిట్ దాఖలు చేసిన రిమాండ్ రిపోర్ట్‌లో సంచలన అంశాలు వెలుగుచూశాయి. నాన్‌బెయిలబుల్ వారెంట్‌పై అదుపులోకి తీసుకున్న సాయికృష్ణను కృష్ణలంక పోలీస్ స్టేషన్‌కు తీసుకొచ్చిన తర్వాత ఆయన అదృశ్యమైనట్లు సిట్ పేర్కొంది. 2026 మే 6 నుంచి జూన్ 19 మధ్య జరిగిన ఘటనలపై సాయికృష్ణ తల్లి విజయలక్ష్మి ఫిర్యాదు మేరకు దర్యాప్తు చేపట్టినట్లు వెల్లడించింది.

ఈ కేసులో 17 మంది సాక్షులను విచారించినట్లు, ఫోరెన్సిక్ బృందం సహాయంతో సీసీటీవీ వ్యవస్థను పరిశీలించినట్లు తెలిపింది. అయితే మే 1 నుంచి జూన్ 1 వరకు కృష్ణలంక పోలీస్ స్టేషన్ సీసీ ఫుటేజ్ అందుబాటులో లేకపోవడం అనుమానాలకు తావిచ్చిందని పేర్కొంది.

మే 6న టాస్క్‌ఫోర్స్ పోలీసులు సాయికృష్ణను అదుపులోకి తీసుకుని సీఐ నాగరాజుకు అప్పగించినప్పటికీ, ఆయనను న్యాయస్థానంలో హాజరుపరచలేదని సిట్ గుర్తించింది. దీనిపై నాగరాజు సరైన సమాధానం ఇవ్వలేదని పేర్కొంది. అలాగే సీసీ ఫుటేజ్ డిలీట్ చేయడం, సాయికృష్ణ అదృశ్యంపై అడిగిన ప్రశ్నలకు కూడా స్పష్టత ఇవ్వలేదని రిమాండ్ రిపోర్ట్‌లో వెల్లడించింది.

సాయికృష్ణ కస్టడీలోనే మృతిచెందాడనే అనుమానాలపై దర్యాప్తు కొనసాగుతోందని, కేసులో ఇతరుల పాత్రపై కూడా విచారణ చేపట్టనున్నట్లు సిట్ తెలిపింది. పూర్తి సహకారం అందించకపోవడంతో నాగరాజును కస్టడీకి ఇవ్వాలని కోర్టును కోరింది. కేసులో మరిన్ని కీలక విషయాలు వెలుగులోకి వచ్చే అవకాశం ఉందని అధికారులు భావిస్తున్నారు.