దాడితో విద్యార్థుల గొంతును నొక్కలేరు: అభిజీత్ దిప్కే

జైపూర్‌లో నిర్వహించిన నిరసన కార్యక్రమంలో తనపై జరిగిన దాడిపై కాక్రోచ్ జనతా పార్టీ (CJP) వ్యవస్థాపకుడు అభిజీత్ దిప్కే తీవ్రంగా స్పందించారు. తనపై జరిగిన దాడి వ్యక్తిగతంగా తనను లక్ష్యంగా చేసుకుని చేసిన చర్య కాదని, అసలు సమస్యల నుంచి ప్రజల దృష్టిని మళ్లించడానికి, విద్యార్థుల గొంతును నొక్కివేయడానికి చేసిన ప్రయత్నమని ఆరోపించారు. విద్యార్థులు ఎదుర్కొంటున్న సమస్యలు, పరీక్షల నిర్వహణలో చోటుచేసుకున్న వివాదాలపై తాము ప్రశ్నలు లేవనెత్తుతున్నందుకే ఇలాంటి దాడులు జరుగుతున్నాయని అన్నారు.

ధర్మేంద్ర ప్రధాన్ విద్యాశాఖ మంత్రిగా నైతిక బాధ్యత వహిస్తూ వెంటనే రాజీనామా చేయాలని ఆయన డిమాండ్ చేశారు. విద్యార్థుల భవిష్యత్తుతో సంబంధం ఉన్న అంశాల్లో ప్రభుత్వం పారదర్శకంగా వ్యవహరించాలని కోరారు. దాడులు, బెదిరింపులు తమ ఉద్యమ స్ఫూర్తిని దెబ్బతీయలేవని, విద్యార్థుల హక్కులు, న్యాయం కోసం తమ పోరాటం మరింత బలంగా కొనసాగుతుందని స్పష్టం చేశారు. ప్రజాస్వామ్యంలో భిన్నాభిప్రాయాలను అణచివేయడం సరైన పద్ధతి కాదని అభిజీత్ దిప్కే వ్యాఖ్యానించారు.