నల్గొండలో ఘోర రోడ్డు ప్రమాదం.. ముగ్గురు మృతి

నల్గొండ జిల్లాలో జరిగిన ఘోర రోడ్డు ప్రమాదం విషాదాన్ని మిగిల్చింది. పెద్దవుర మండలం రామన్నగూడెం గ్రామ సమీపంలోని ముత్యాలమ్మ ఆలయం వద్ద ఎదురెదురుగా వస్తున్న రెండు కార్లు ఢీకొనడంతో ఈ ప్రమాదం చోటుచేసుకుంది. ఢీకొన్న వేగం తీవ్రంగా ఉండటంతో వాహనాలు నుజ్జునుజ్జయ్యాయి.

ఈ ప్రమాదంలో ముగ్గురు వ్యక్తులు అక్కడికక్కడే మృతి చెందగా, మరో ముగ్గురు తీవ్రంగా గాయపడ్డారు. సమాచారం అందుకున్న పోలీసులు వెంటనే సంఘటనా స్థలానికి చేరుకుని సహాయక చర్యలు చేపట్టారు. గాయపడిన వారిని నాగార్జునసాగర్ ఏరియా ఆసుపత్రికి తరలించి చికిత్స అందిస్తున్నారు. వారి పరిస్థితి విషమంగా ఉన్నట్లు సమాచారం.

ప్రమాదానికి గల కారణాలపై పోలీసులు విచారణ ప్రారంభించారు. మృతుల వివరాలు సేకరించే పనిలో ఉన్నారు. ఘటనతో ఆ ప్రాంతంలో విషాద ఛాయలు అలుముకున్నాయి. రోడ్డు భద్రతా నిబంధనలు పాటించాలని, అతివేగం ప్రమాదాలకు దారితీస్తుందని పోలీసులు హెచ్చరిస్తున్నారు. కేసు నమోదు చేసి అన్ని కోణాల్లో దర్యాప్తు కొనసాగిస్తున్నారు.