ఆక్వాలో సిండికేట్ దందా.. రొయ్యల రైతులకు కోట్లలో నష్టం!

ఉమ్మడి కృష్ణా, గోదావరి జిల్లాల్లో ఆక్వా రంగాన్ని సిండికేట్ వ్యాపారులు గుప్పెట్లో పెట్టుకుని రొయ్యల రైతులను తీవ్రంగా నష్టపరుస్తున్నారనే ఆరోపణలు వెల్లువెత్తుతున్నాయి. అంతర్జాతీయ మార్కెట్‌తో సంబంధం లేకుండానే కొనుగోలు ధరలను కృత్రిమంగా తగ్గిస్తూ, రైతుల కష్టాన్ని లాభాలుగా మార్చుకుంటున్నారని రైతులు ఆవేదన వ్యక్తం చేస్తున్నారు. సాగు ఖర్చులు, తెగుళ్లతో పోరాడి పంట చేతికొచ్చే సమయంలోనే ధరలకు కోత విధించడం వల్ల రైతులు తీవ్రంగా నష్టపోతున్నారు.

ఉమ్మడి కృష్ణా జిల్లాలోనే దాదాపు 1.5 లక్షల ఎకరాల్లో రొయ్యల సాగు జరుగుతోంది. కొనుగోలు సంస్థలు సుమారు 20 ఉన్నప్పటికీ, కేవలం ఐదుగురు బడా వ్యాపారులే ధరలను నియంత్రిస్తున్నారని రైతులు ఆరోపిస్తున్నారు. ప్రతి ఏడాది సీడ్ వేసే సమయంలో అధిక ధరలు చూపించి రైతులను ప్రోత్సహిస్తారు. అయితే పంట కోత సమయానికి రోజుకు కేజీకి రూ.10 చొప్పున ధరలు తగ్గిస్తూ సిండికేట్ వ్యూహం అమలు చేస్తున్నారని చెబుతున్నారు.

టైగర్ రొయ్యల ధర మార్చిలో కేజీకి రూ.750 ఉండగా ప్రస్తుతం రూ.670కు పడిపోయింది. దీంతో ఎకరానికి సగటున రూ.80 వేల వరకు రైతు నష్టపోతున్నాడు. వెనామీ రొయ్యల ధర కూడా కేజీకి రూ.270 నుంచి రూ.235కు పడిపోవడంతో ఎకరానికి మరో రూ.35 వేల వరకు నష్టం వాటిల్లుతోంది. ఈ ధరల వ్యత్యాసం వల్ల రైతుల ఆదాయం భారీగా తగ్గిపోయిందని ఆవేదన వ్యక్తమవుతోంది.

మరోవైపు రొయ్యల మేత (ఫీడ్) ధరలు టన్నుకు రూ.12 వేల వరకు పెరగడం రైతులపై అదనపు భారం మోపుతోంది. ప్రభుత్వం కిలోకు రూ.4 తగ్గించాలని ఆదేశించినప్పటికీ, ఫీడ్ కంపెనీలు ఆ ఆదేశాలను పట్టించుకోవడం లేదని రైతులు ఆరోపిస్తున్నారు. అధికారులు కూడా చర్యలు తీసుకోవడం లేదని విమర్శిస్తున్నారు.

మత్స్యశాఖ అధికారులు మార్కెట్‌ను పర్యవేక్షించి రైతులకు న్యాయమైన ధర దక్కేలా చూడాల్సి ఉండగా, కొందరు అధికారులు నెలవారీ మామూళ్లు తీసుకుంటూ మౌనంగా ఉంటున్నారనే ఆరోపణలు వినిపిస్తున్నాయి. నాణ్యత ధ్రువీకరణ, ధరల పర్యవేక్షణ వంటి బాధ్యతలను విస్మరించడం వల్ల సిండికేట్ దందా మరింత బలపడిందని రైతులు అంటున్నారు.

వ్యాపారులను ప్రశ్నిస్తే తమ రొయ్యలను కొనుగోలు చేయరేమోనన్న భయంతో రైతులు తక్కువ ధరలకే పంటను విక్రయించాల్సిన పరిస్థితి నెలకొంది. ఇప్పటికైనా రాష్ట్ర ప్రభుత్వం జోక్యం చేసుకుని సిండికేట్ గుత్తాధిపత్యానికి అడ్డుకట్ట వేయాలని, మార్కెట్‌లో పారదర్శకత తీసుకురావాలని, రైతులకు గిట్టుబాటు ధర కల్పించాలని ఆక్వా రైతులు ప్రభుత్వాన్ని కోరుతున్నారు. లేకపోతే కోస్తా ప్రాంతంలో వేలాది కుటుంబాలకు ఆధారమైన ఆక్వా రంగం తీవ్ర సంక్షోభంలో పడే ప్రమాదం ఉందని హెచ్చరిస్తున్నారు.