ఓఆర్ఆర్పై 11 ఏళ్ల బాలుడితో లగ్జరీ కారు డ్రైవింగ్.. తండ్రిపై కేసు
#తెలంగాణ #హైదరాబాద్ #ORR #luxury car #video #case file #Traffic Police
హైదరాబాద్ ఔటర్ రింగ్ రోడ్ (ఓఆర్ఆర్)పై 11 ఏళ్ల బాలుడు లగ్జరీ కారును నడిపిన ఘటన సంచలనంగా మారింది. బాలుడు వాహనం నడుపుతున్న వీడియో సోషల్ మీడియాలో వైరల్ కావడంతో పోలీసులు వెంటనే దర్యాప్తు ప్రారంభించారు. విచారణలో కారును నడిపిన బాలుడు మైనర్ అని, వాహనం యజమాని టోలిచౌకీకి చెందిన అబ్దుల్ హాదీ అని గుర్తించారు.
మైనర్ బాలుడికి వాహనం నడిపేందుకు అనుమతి ఇచ్చినందుకు రాజేంద్రనగర్ పోలీసులు అబ్దుల్ హాదీపై మోటార్ వెహికల్స్ చట్టంలోని పలు నిబంధనల కింద కేసు నమోదు చేశారు. అనంతరం అతడిని అదుపులోకి తీసుకుని విచారించారు. ఘటనలో ఉపయోగించిన లగ్జరీ కారును కూడా పోలీసులు సీజ్ చేశారు.
రోడ్లపై ఇలాంటి నిర్లక్ష్య చర్యలు ఇతరుల ప్రాణాలకు ప్రమాదకరమని అధికారులు హెచ్చరించారు. మైనర్లకు వాహనాలు అప్పగించే తల్లిదండ్రులపై కఠిన చర్యలు తీసుకుంటామని స్పష్టం చేశారు. ఈ ఘటన సోషల్ మీడియాలో విస్తృత చర్చకు దారితీసింది.
