‘రుడా’ లేఅవుట్‌లో.... నిబంధనల ‘రూల్’ అవుట్!

రాజమండ్రి రూరల్ ప్రాంతంలో భూదందా మరింత పెరుగుతూ ఆందోళన కలిగిస్తోంది. ముఖ్యంగా ‘రుడా’ పరిధిలో వెలుస్తున్న లేఅవుట్లలో నిబంధనలు పూర్తిగా పక్కన పెట్టి రియల్ మాఫియా ఇష్టారాజ్యంగా వ్యవహరిస్తున్నట్లు ఆరోపణలు వెల్లువెత్తుతున్నాయి. అధికార పార్టీ అండదండలతో కొందరు రియల్టర్లు ప్రభుత్వ భూములను, చెరువులను సైతం ఆక్రమిస్తూ అక్రమ లేఅవుట్లు వేస్తున్నారనే విమర్శలు వినిపిస్తున్నాయి.

చెరువుల కబ్జా.. బఫర్ జోన్‌ల గల్లంతు

రాజమండ్రి రూరల్ పరిధిలోని కాతేరు గ్రామంలో సుమారు 16 ఎకరాలకు పైగా విస్తీర్ణంలో అభివృద్ధి చేస్తున్న ఒక లేఅవుట్ ఇప్పుడు వివాదాస్పదంగా మారింది. సర్వే నంబర్లు 229, 300, 301, 302లో కొనసాగుతున్న ఈ ప్రాజెక్టులో చెరువుకు సంబంధించిన బఫర్ జోన్‌ను పట్టించుకోకుండా ప్లాట్లు వేయడం తీవ్ర ఆందోళనకు గురిచేస్తోంది. నిబంధనల ప్రకారం నీటి వనరుల చుట్టూ 9 నుంచి 30 మీటర్ల వరకు ఖాళీ ప్రదేశం వదలాల్సి ఉన్నా, ఇక్కడ అలాంటి జాగ్రత్తలు తీసుకోలేదని స్థానికులు ఆరోపిస్తున్నారు.

అధికారుల నిర్లక్ష్యం.. అనుమానాస్పద అనుమతులు

రెవెన్యూ, ఇరిగేషన్, పంచాయతీ శాఖల సమన్వయం లేకుండానే అనుమతులు జారీ కావడం వెనుక పెద్ద స్థాయి అవినీతి ఉందా? అనే అనుమానాలు వ్యక్తమవుతున్నాయి. జాయింట్ ఇన్‌స్పెక్షన్లు జరగకపోయినా ‘నో అబ్జెక్షన్ సర్టిఫికెట్లు’ ఎలా మంజూరు అయ్యాయి? అనే ప్రశ్నలకు అధికారులు స్పష్టమైన సమాధానం ఇవ్వడం లేదు.

పబ్లిక్ స్పేస్ దుర్వినియోగం

లేఅవుట్‌లో ఉండాల్సిన కామన్ ఓపెన్ స్పేస్‌ను కొందరు ప్లాట్ యజమానుల ప్రయోజనాల కోసం వ్యక్తిగత రహదారులుగా మార్చినట్లు ఆరోపణలు ఉన్నాయి. ప్లాట్ నంబర్లు 59, 90, 91లకు రోడ్డు లేకపోవడంతో, ప్రజలందరికీ ఉపయోగపడాల్సిన స్థలాన్ని వారికి దారిగా కేటాయించడం నిబంధనలకు విరుద్ధమని నిపుణులు చెబుతున్నారు.

హైటెన్షన్ లైన్ల మధ్య ప్లాట్లు

లేఅవుట్ ఉత్తర భాగంలో 11 కేవీ విద్యుత్ లైన్లు ఉండగా, అవసరమైన సేఫ్టీ క్లియరెన్స్ లేకుండా ప్లాట్లు కేటాయించడం మరో పెద్ద సమస్యగా మారింది. విద్యుత్ శాఖ నుంచి సరైన అనుమతులు లేకుండా ఇలాంటి ప్రాజెక్టులకు గ్రీన్ సిగ్నల్ ఎలా ఇచ్చారన్నది ప్రశ్నార్థకంగా మారింది.

ప్రజల్లో ఆందోళన

ఈ లేఅవుట్‌లో ప్లాట్లు కొనుగోలు చేసిన వారు భవిష్యత్తులో న్యాయపరమైన సమస్యలు ఎదుర్కొనే అవకాశం ఉందనే భయం వ్యక్తం చేస్తున్నారు. రిజిస్ట్రేషన్ సమస్యలు, కోర్టు కేసులు, మౌలిక వసతుల కొరత వంటి సమస్యలు తలెత్తే అవకాశముందని స్థానికులు ఆందోళన చెందుతున్నారు.

సమగ్ర విచారణకు డిమాండ్

ఈ వ్యవహారంపై సమగ్ర దర్యాప్తు జరిపి, నిబంధనలు ఉల్లంఘించిన వారిపై కఠిన చర్యలు తీసుకోవాలని ప్రజలు డిమాండ్ చేస్తున్నారు. అక్రమ లేఅవుట్లకు అనుమతులు ఇచ్చిన అధికారులపై కూడా విచారణ జరిపి బాధ్యతను నిర్ణయించాలని కోరుతున్నారు. ప్రభుత్వ భూములు, నీటి వనరులను రక్షించడంలో అధికార యంత్రాంగం అప్రమత్తంగా వ్యవహరించాల్సిన అవసరం ఉందని నిపుణులు సూచిస్తున్నారు.