విజయవాడలో జర్నలిస్టుల సేవలను కొనియాడుతూ జర్నలిస్ట్ అసోసియేషన్ ఆఫ్ ఆంధ్రప్రదేశ్ (జాప్) ఆధ్వర్యంలో డైరీ ఆవిష్కరణ కార్యక్రమం ఘనంగా నిర్వహించారు. జాప్ కార్యాలయంలో జరిగిన ఈ కార్యక్రమానికి రాష్ట్ర అధ్యక్షుడు పున్నం రాజు ముఖ్య అతిథిగా హాజరై డైరీని ఆవిష్కరించారు. ఈ సందర్భంగా ఆయన మాట్లాడుతూ ప్రజా సమస్యలను వెలుగులోకి తీసుకువచ్చి, ప్రభుత్వ పథకాల అమలులో కీలక పాత్ర పోషించేది జర్నలిస్టులేనని అన్నారు. జర్నలిస్టులు ప్రజల గొంతుకగా వ్యవహరిస్తూ సమాజ అభివృద్ధికి తోడ్పడుతున్నారని పున్నం రాజు పేర్కొన్నారు. ప్రభుత్వం ప్రవేశపెట్టిన సంక్షేమ పథకాలను ప్రజలకు చేరవేయడంలో మీడియా పాత్ర అపారమని ఆయన అన్నారు. ప్రజా సమస్యలపై నిరంతరం స్పందిస్తూ, వాటి పరిష్కారానికి ఒత్తిడి తీసుకురావడంలో జర్నలిస్టులు ముందుంటారని చెప్పారు.
జాప్ సంస్థ గత 33 సంవత్సరాలుగా జర్నలిస్టుల హక్కుల కోసం పోరాడుతూ వస్తోందని గుర్తుచేశారు. జర్నలిస్టుల సంక్షేమం, భద్రత, వృత్తి గౌరవం కోసం సంస్థ నిరంతరం కృషి చేస్తోందని తెలిపారు. అయితే ఇటీవల జర్నలిస్టులపై దాడులు పెరుగుతున్నాయని ఆందోళన వ్యక్తం చేశారు. ఇలాంటి ఘటనలను తీవ్రంగా ఖండిస్తూ, దాడులకు పాల్పడిన వారిపై కఠిన చర్యలు తీసుకోవాలని ప్రభుత్వాన్ని డిమాండ్ చేశారు.
జర్నలిస్టుల సమస్యల పరిష్కారానికి ప్రభుత్వం ప్రకటించిన హామీలను వెంటనే అమలు చేయాలని పున్నం రాజు కోరారు. ఉద్యోగ భద్రత, బీమా, హౌసింగ్, ఆరోగ్య సదుపాయాలు వంటి అంశాల్లో ప్రభుత్వం మరింత చొరవ చూపాల్సిన అవసరం ఉందన్నారు. జర్నలిస్టులు ఐకమత్యంతో ముందుకు సాగితేనే తమ హక్కులను సాధించగలమని పిలుపునిచ్చారు. ఈ కార్యక్రమంలో జాప్ యూనియన్ నాయకులు డి. వెంకట్ రెడ్డి, కే. అనిల్ కుమార్ రెడ్డి, ఎస్. సూర్యనారాయణ బాబు, ప్రభాకర్, లోకేష్, శివకుమార్ తదితరులు పాల్గొన్నారు. కార్యక్రమం ఉత్సాహభరితంగా సాగింది.
