ట్రాఫిక్ పోలీసులకు ‘సురక్ష’ నుంచి మజ్జిగ, ఓఆర్‌ఎస్ పంపిణీ

విజయవాడ నగరంలో రోజురోజుకూ పెరుగుతున్న ఎండ తీవ్రత ప్రజలను ఉక్కిరిబిక్కిరి చేస్తోంది. మండుతున్న ఎండల్లో రహదారులపై విధులు నిర్వహిస్తున్న ట్రాఫిక్ పోలీసుల పరిస్థితిని దృష్టిలో ఉంచుకుని సురక్ష సేవా సంస్థ ఆధ్వర్యంలో ప్రత్యేక సేవా కార్యక్రమం నిర్వహించారు. ట్రాఫిక్ సిబ్బంది ఆరోగ్య రక్షణ కోసం వెయ్యి మజ్జిగ ప్యాకెట్లు, వెయ్యి ఓఆర్‌ఎస్ ప్యాకెట్లను ఉచితంగా పంపిణీ చేశారు.

పోలీస్ కమిషనర్ కార్యాలయంలో ఏర్పాటు చేసిన కార్యక్రమంలో సురక్ష సేవా సంస్థ ప్రతినిధి సమత కుదరవల్లి చేతుల మీదుగా ట్రాఫిక్ డీసీపీ షరీన్ బేగంకు సేవా సామగ్రిని అందజేశారు. ఈ కార్యక్రమాన్ని సురక్ష కన్వీనర్ కే.వీ. నరసయ్య పర్యవేక్షించారు.

ఈ సందర్భంగా డీసీపీ షరీన్ బేగం మాట్లాడుతూ, తీవ్రమైన వడగాల్పుల సమయంలో అలుపెరుగక విధులు నిర్వర్తించే ట్రాఫిక్ సిబ్బందికి ఉపశమనం కలిగించేలా సురక్ష సేవా సంస్థ ముందుకు రావడం అభినందనీయమన్నారు. సమాజం పట్ల బాధ్యతతో స్పందించిన సంస్థ ప్రతినిధులను ఆమె ప్రత్యేకంగా అభినందించారు.

అనంతరం సురక్ష కన్వీనర్ కే.వీ. నరసయ్య మాట్లాడుతూ, ఎండలు తగ్గే వరకు ప్రజలంతా అప్రమత్తంగా ఉండాలని సూచించారు. ప్రయాణాల్లో నిర్లక్ష్యం చేయకుండా నీరు, మజ్జిగ, ఓఆర్‌ఎస్ వంటి ద్రవాహారాలను ఎక్కువగా తీసుకోవాలని సూచించారు. వడదెబ్బ లక్షణాలు కనిపిస్తే వెంటనే వైద్యులను సంప్రదించాలని తెలిపారు.

నగర ప్రజల ఆరోగ్యాన్ని దృష్టిలో ఉంచుకుని నిర్వహించిన ఈ సేవా కార్యక్రమంలో ట్రాఫిక్ డీఎస్‌పీ శ్రీవేద గురుగుబెల్లి, పలువురు పోలీస్ అధికారులు, సురక్ష సేవా సంస్థ ప్రతినిధులు పాల్గొన్నారు. మండుతున్న ఎండల్లో ఇటువంటి సేవా కార్యక్రమాలు ప్రజలకు, విధుల్లో ఉన్న సిబ్బందికి ఎంతో ఉపశమనాన్ని కలిగిస్తున్నాయని స్థానికులు అభిప్రాయపడ్డారు.