ఏపీ హైకోర్టులో నేడు సాయికృష్ణ కేసు విచారణ
#ఆంధ్రప్రదేశ్ #హైకోర్టు #సాయికృష్ణ #lockupdeath #police
ఆంధ్రప్రదేశ్ హైకోర్టులో నేడు సాయికృష్ణ లాకప్ డెత్ కేసుకు సంబంధించిన రెండు కీలక పిటిషన్లపై విచారణ జరగనుంది. సాయికృష్ణ తల్లి దాఖలు చేసిన హెబియస్ కార్పస్ పిటిషన్తో పాటు, కేసు దర్యాప్తును రాష్ట్ర పోలీసుల నుంచి సీబీఐకి బదిలీ చేయాలని కోరుతూ దాఖలు చేసిన అనుబంధ పిటిషన్ను కూడా హైకోర్టు పరిశీలించనుంది. ఈ కేసును జస్టిస్ రవి నాథ్ తిలహరి, జస్టిస్ సుభేందు సమంతాతో కూడిన ధర్మాసనం విచారించనుంది.
ఇటీవల కేసు దర్యాప్తులో సిట్ కీలక పరిణామాలను వెలుగులోకి తీసుకురావడంతో ఈ విచారణపై రాష్ట్రవ్యాప్తంగా ఆసక్తి నెలకొంది. సాయికృష్ణ మృతి, దర్యాప్తు పురోగతి, సీబీఐ విచారణ అవసరంపై కోర్టు ఎలాంటి అభిప్రాయం వ్యక్తం చేస్తుందన్నది ప్రాధాన్యత సంతరించుకుంది. ఈ కేసులో హైకోర్టు ఇచ్చే ఆదేశాలు దర్యాప్తు తదుపరి దిశను ప్రభావితం చేసే అవకాశముందని న్యాయవర్గాలు భావిస్తున్నాయి.
